|
مساء الخيرات والليرات..
كيفكم ياجماعة الربع الموقرين.. وكيف الاهل والوالد والوالده ..؟ عساهم بخير.. 
المهم مالكم بالطويله..
انا فتاة حباني الله بالعديد من المواهب.. 
واحدى هذه المواهب هي الابداع في رؤوس الاوادم..
احب شيء بالحياة اسمه قص شعر..
انتشي عندما ارى شوشه بجانبها مقص..
هذي قمة الرومنسيه عندي..
وشيء طبيعي كل واحد في مجال عمله يتعرض للعديد من المواقف..
منها الايجابي ومنها السلبي.. < قولي قا 
ولولا الخطاء لما تعلمنا الصواب < يمديكم ع الفلسفه
وبما اني كوافيرة العائله ولا منافس لي في هذا المجال من بنات جيلي رعاني الله..
بقولكم بعض المواقف اللي صارت معي في هذا المضمار..
في احدى المراريت وبينما كنت مندمجه بقص شعر اختي < حقل تجاربي ياصبرها علي 
عاد انا تجيني حالات لا اندمجت وخروا عني.. كأني منومه مغناطيسيا ولا اصحى الا اذا قضيت..
الموووهيم.. وفي احدى غفواتي المغناطيسية.. وانا مسترسله بالمقص اجز في راسها من كل جانب..
وفجأة دون سابق انذار البنت نطت وصرخت صرخه عم دويها في ارجاء المنزل.. 
قامت وحطت يدها على اذنها ويوم ناظرت بيدها الا وتشوف الدم باطراف اصابعها ثم رمقتني بنظرة يتطاير منها الشرر وقالت :
ياحيـ## ياحمـ## ماتشوفين انتي عميا ..؟ اذني يا مال الكسر اللي يكسر يدك قولي امين.. 
اثاريني قصيت طرف اذنها > لايروح بالكم بعيد.. لا لا مجرد جرح نقدر نقول عنه بسيط بس اختي رعاها الله لسانها متبري منها
طبعا راعيت حالتها النفسيه انذاك واكتفيت بالصمت مقابل ما يوجه الي من شتائم < بلاك خايفة منها
لا وازيدكم من الشعر هاوس
اذكر في احدى المرات في ليلة عيد الفطر والكل مشغوول بنفسه..
اخوي وقتها كان تقريبا ثاني او ثالث ابتدائي راح الحلاق يبي يحلق كبوريا..< زمان يافن 
المووهيم رجع وهو مو راضي عن شكله وشعره مو عاجبه.. 
وبعد ماقام برحلة تامل في الذات قدام المراية امتدت لقرابة النصف ساعه جاني وهو معزم ومقرر وما بإذنه ماي..
اخذ نفس وقالي: ابيك تعدلين لي شعري..
عاد بيني وبينكم عجبتني الفكرة < انتي من الله تدورين لك راس تلعبين فيه
بس قلت لازم ابري ذمتي واخلي مسؤليتي..
قلت له ايه بس اخاف اخربه 
قال لا لا ماعليك بس خففي لي الشعر اللي تحت شوي.. ابيه يبين انه كبوريا..
والله وانا اقوم وافرد طولي وقلت له امري لله يلا قدامي ع الغرفه.. < تسمع بالثقل
واجلسه واحط على اكتافه منشفه < ضابطة الدور
وامسك المقص وابداء من عند اذنه واقص واقص واقص ناظرت في راسه حسيت ان فيه شيء غلط  بس قلت لا لا يتهيألك هذي نغزة من نغزات الشيطان يوسوس لك بس كملي..
و اتعوذ من ابليس والف راس الولد ع الجهه الثانيه واستلمه قص ..
اصلا الشعر يادوب ينمسك مررررة خفيف واللي اقدر امسكه قصيته واللي ماينمسك حاولت اعدل فيه قدر الامكان..
شوي شوي الا اتحمس وارفع يدي فوق واكمل قص الين ماصار راس الولد من فوق كنه ( منقله ) بس على اكبر شوي 
لا واللي تحت طالع دوائر شيء مافيه شعر نهائي وشيء فيه شعر خفييييف وشيء اكثر شوي < كن راسه محترق
يوم شفت الوضع كذا قلت خليني اوقف على كذا قبل لا اخربها اكثر..
المهم الولد رفع راسه وناظر بالمرايه واختفت من وجهه اي علامة يمكن تفسيرها..
ملامحه اكتساها جموود غريب
ما ادري هو عاجبه.. والا زعلان.. والا انفجع بشكله .. والا جاله انهيار..
وجهه جامد ويناظر بنفسه ويقلب راسه يمين ويسار..
بعدين تحول شكله لواحد فيه الصيحه.. 
بالذات يوم شاف الكارثة وانه جهه اخف من جهه
قال وش هذا ؟ 
قلت له بالعكس حلوو نفس شعر محمد شعيبي بمسلسل جرح الزمن < تسمع بالترفيع
تجمعت الدموع بعيونه وكان بيقول شيء ولاقدر يكمل جملته وطلع باسرع ماعنده راح الصاله .. < معروفه يبي يقدم فيني بلاغ عند ابوي وامي 
يوم راح خفت ألحقة ما أأمن ردت فعلهم
قعدت اتسمع ردود الافعال على هالطامة اللي انا مسويتها .. اول مادخل هبطت الاصوات فجأة ..
الكل منصدم باللي يشوفه.. ( وش هذااااااااااااااااااا؟؟  .. يااويليييييييي .. اشوف اشوف .. ياللللللللللله .. واللي سكت شوي بعدها مات ضحك .. )
يوم حسيت ان الجو شوي لطيف وبه ضحك طلعت للاضواء
طبعا اخذت لي كلمتين ليش اني لعبت براسه ليله العيد
وهو المسكين ماغير يصيح متفشل اشلون بيعيد بكرة وشعره كذا 
وداه ابوي للحلاق مرة ثانيه وهناك شافه رجال قال لابوي: نصيحه ألحِقها بعضها < يعني كمل راسه كله ع الزيرو لغير الناطقين بالشماليه
واخذ والدي بنصيحه هذا الرجل وفعلا حلقوه ع الزيرو
لكن ابوي حفظه الله ورعاه راعى حالة اخوي النفسية المتحطمة ولم يتركه هكذا بل شرا له شماغ وعقال عشان يرفع معنوياته ويغطي صلعته.. 
ومن بعدها حرموا افراد العائله انهم يسلموني روسهم..
حتى زوج اختي تعقد .. وصار اذا جابهم عندنا يوصي اختي يقول قولي لاختك تبعد عن شعور بناتي
لماذا هكذا يعاملونن..؟ ايحكمون على موهبتي بالفشل بسبب تجربة او اثنتين فقط 
صدق من قال غلطة الشاطر بألف < قصدك كارثه مو غلطه
بس مانقدر نقول غير الشكوى لله عالم ماتقدر المواهب ماعندهم غير تكسير مجاديف
مايستفاد:
1/ لاتقدم على شيء الا وانت متاكد من قدراتك ومستواك .. والا سوف تغرز في منتصف الطريق
2/ لاتحاول بتاتا الرد على شخص منفعل من خطاء انت ارتكتبه..فقط التزم الصمت حتى يفرغ كل ماعنده لكي لايتطور الامر الى مد الايدي وحدوث اصابات ..
3/ اذا كان الشعر قصيرا جدا لاتحاول تسويته بمقص بل استخدم ماكينه حلاقه ..
4/ لاتتحطموا من محاولتين او ثلاث فاشلات بل استمروا وضعوا نصب عينيكم قصة النملة وحبة القمح ..
وبس خلاص..
للتعليق على الموضوع ارعص هنآ للخشوش
واذ1 عندكم مواضيع سنعه ارسلوها على ايميل القروب
mragig@yahoogroups.com
| 
Send Email
أرخص فندق في العالم .. 
